Merħba fuq dan is-sit tfal! Jien Barbra!
Kontu tafu li intom it-tfal għandkom id-drittijiet? Dawn id-drittijiet jgħinuna ngħixu ħajja sigura waqt li nikbru u niżviluppaw f’kull qasam tal-ħajja!
Ara il-filmat
1
Id-dritt li tkun f’saħħtek
Huwa d-dritt tiegħek li tkun f’saħħtek kemm jista’ jkun. Se tingħata l-għajnuna kollha li għandek bżonn biex tkun u tibqa’ f’saħħtek u ma timradx. Se tkun ukoll protett/a minn drogi li jagħmlu ħsara lis-saħħa tiegħek.
2
Id-dritt għat-tagħlim
Għandek dritt li tmur l-iskola. B’hekk inti tista’ tiżviluppa t-talenti u l-kapaċitajiet uniċi tiegħek. Se titgħallem ukoll kif tgħix b’mod responsabbli u kif turi rispett lejn in-nies u l-affarijiet kollha ta’ madwarek.
3
Id-dritt tal-espressjoni u l-opinjoni
Inti għandek id-dritt li tgħid x’inhuma l-ħsibijiet u l-opinjonijiet tiegħek, sakemm dan ma jkunx ta’ ħsara għalik jew għal nies oħra. Huwa importanti li tikseb u taqsam ma’ ħaddieħor kull informazzjoni u ideat li jistgħu jgħinuk tiżviluppa bħala persuna, sakemm dan ma jkunx ta’ ħsara għalik jew għal ħaddieħor. Dan tista’ tagħmlu permezz tal-internet, it-televiżjoni, ir-radju, il-gazzetti u mezzi oħra ta’ komunikazzjoni.
4
Id-dritt għat-trobbija
Inti għandek tiġi mrobbi mill-ġenituri tiegħek jew minn adulti oħra li jieħdu ħsiebek. Dawk li jieħdu ħsiebek għandhom id-dmir li jagħmlu dak li hu l-aħjar għalik.
5
Id-dritt għall-mistrieħ
Għandek ikollok il-ħin u ċ-ċans biex tistrieħ, tilgħab u tkun kreattiv.
6
Id-dritt li tinstema'
Min qed jiddeċiedi għalik għandu jisma’ u jqis l-opinjoni tiegħek. Dan jgħodd kemm fil-familja, kif ukoll barra mill-familja u f’sitwazzjonijiet oħra bħal per eżempju fl-iskola u fil-Qorti.
7
Id-dritt tal-prattika
Inti għandek id-dritt li tipprattika l-kultura, il-lingwa u r-reliġjon tiegħek.